EspadELA en Ordes - Oroso

Datas confirmadas en Ordes-Oroso

Lugar Oficina do Sindicato Labrego en Ordes (rúa Alfonso Senra 17) e aula CEMIT do Concello de Oroso

Datas Mércores 17, 24 e 31 de outubro e xoves 8 e 15 de novembro

Contacto: arabias.coop@gmail.com 667 384 221/619457324

Escola EspadELA

EspadELA é unha escola de empoderamento para mulleres do rural que xorde da necesidade de crear espazos propios de encontro onde compartir e aprender conxuntamente. Trátase de contar cun tempo persoal para a aprendizaxe e o intercambio con outras mulleres, tecendo redes que permitan estar conectadas no illamento que ás veces acompaña a vida nos escenarios rurais.

Xa desde finais do século XX, no marco da Plataforma de Acción de Beijing, establécese o empoderamento como un dos obxectivos estratéxicos da loita feminista, procurando aumentar a participación das mulleres nos espazos de toma de decisión e acceso ao poder. O empoderamento refire un proceso que se establece nunha dobre dimensión, individual e colectiva, e que garda relación coa superación de prácticas socioculturais que seguen perpetuando a desigualdade de oportunidades e valor entre mulleres e homes.

Neste caso partimos do traballo no plano persoal para introducir cambios que melloren as condicións de vida das mulleres do rural, coa intención de que estas mudanzas podan espallarse e compartirse nunha rede de sororidade e recoñecemento feminino. Coñecer as nosas capacidades, por en valor os nosos saberes e quefaceres, compartir e crear colectivamente, serán algúns dos proxectos arredor dos cales traballaremos en EspadELA, buscando promover a participación activa das mulleres a nivel sociocomunitario.

EspadELA en Compostela

Datas confirmadas en Compostela

Lugar Oficina do Sindicato Labrego Galego (rúa Ofelia Nieto 13-23) e no Centro Sociocultural de Villestro (lugar de Quintáns, Villestro)

Datas Martes 16, 23 e 30 de outubro e o 6 e 13 de novembro

Contacto: arabias.coop@gmail.com 667 384 221/619457324

EspadELA

A espadela é o intrumental máis miúdo que se utilizaba no traballo da transformación do liño. Tratábase dunha labor case exclusivamente feminina que consistía nun proceso longo e laborioso. O esforzo que requiría este procedemento de transformación do liño esixía o traballo en rede das mulleres, e por tanto, provocaba xuntanzas entre elas. Así, xerábanse espazos de traballo conxunto, encontros de solidariedade e reciprocidade.

Por iso decidimos que esta escola de empoderamento de mulleres do rural debía chamarse EspadELA: Unha escola que nace para crear espazos de comprensión, de formación e de intercambio de experiencias entre mulleres.

(Allariz-1930- serie “Os traballos do Liño” foto de José Suárez Fernández)